"Neft daşları"ında istismar quyusu fontan vurub

28 Avqust 21:32

Bu gün səhər saatlarında “Azneft” İB-nın “Neft Daşları” NQÇİ-nin 1541 saylı estakadayanı meydançasında istismar quyusunda aparılan təmir işləri zamanı quyu açıq fontana keçib.

Bu barədə “Azneft” İB-dən məlumat verilib.

Hadisə nəticəsində xəsarət alan olmayıb və yanğın qeydə alınmayıb.

Meydançada işlək quyuların fəaliyyəti dayandırılıb, orada işləyən əməkdaşlar təhlükəsiz əraziyə uzaqlaşdırılıb və bütün zəruri təhlükəsizlik tədbirləri həyata keçirilib.

Fontanın ram edilməsi istiqamətində, SOCAR-ın, Sənaye Təhlükəsizliyi İdarəsinin tullanışa qarşı operativ qrupunun və Fövqəladə Hallar Nazirliyinin Dövlət Yanğından Mühafizə Xidmətinin əməkdaşları tərəfindən texniki və təşkilati tədbirlər davam etdirilir.

Hadisə ilə əlaqədar, SOCAR-ın Böhran vəziyyətləri və fövqəladə hallar üzrə komissiyası prosesi Baş ofisin Böhran Mərkəzində qaydalara uyğun olaraq idarə edir.

Hadisə ilə bağlı ictimaiyyətə əlavə məlumat veriləcək.

Qeyd edək ki, bədbəxt hadisələrə yol aça bilən belə insidentlər quyularda istifadə edilən detalların istismar müddətindən artıq istifadə edilməsi səbəbindən baş verir.