Avropadan Rusiyaya 10-cu sanksiya paketi
Avropa İttifaqı Rusiya Federasiyasına qarşı Rusiyanın Ukraynaya təcavüzünün ildönümündə tətbiq ediləcək 10-cu sanksiyalar paketi ilə bağlı razılığa gəlib.
Aİ ölkələri Rusiyaya qarşı onuncu sanksiyalar paketi ilə bağlı razılığa gəliblər. Bu barədə İsveçin Aİ-dəki nümayəndəliyi və “Azadlıq” radiosunun Avropadakı redaktoru Rikard Yozviak məlumat verib.
Artıq üçüncü gündür ki, Avropa İttifaqına üzv ölkələrin səfirləri Rusiyaya qarşı onuncu sanksiyalar paketi ilə bağlı razılığa gələ bilməyiblər. Bu barədə Reuters diplomatlar arasında olan mənbələrə istinadən xəbər verir.
Agentliyin həmsöhbətlərinin sözlərinə görə, məhdudiyyətlərin qəbulu Rusiya rezininin idxalına qarşı daha sərt sanksiyaların tətbiqində israrlı olan Polşa tərəfindən əngəllənib.
Onuncu sanksiyalar paketinin fevralın 24-də - Rusiyanın Ukraynaya tammiqyaslı işğalının başlanmasının ildönümündə qəbul edilməsi planlaşdırılırdı, lakin bir neçə raund danışıqlardan sonra ölkələr razılığa gələ bilməyib.
“Bu, çox pisdir. Burada əsas məsələ bu xüsusi gündə Ukrayna ilə həmrəylik mesajı olmalı idi”, - danışıqlarda iştirak edən diplomat Reuters-ə bildirib.
Avropa İttifaqı Rusiyaya qarşı sanksiyaların onuncu paketinə Tinkoff Bank, Alfa Bank və Rosbank-a qarşı məhdudlaşdırıcı tədbirləri daxil etməyi planlaşdırır, bu barədə Bloomberg daha əvvəl bildirib. Aİ həmçinin Rusiyanın fiziki və hüquqi şəxslərinə qarşı sanksiyaları genişləndirməyi, elektronika və nadir torpaq metallarına məhdudiyyətlər qoymağı planlaşdırır. EUobserver bildirib ki, yeni paketin bir hissəsi kimi Rusiyaya sanitar məmulatların ixracına qadağaya baxılır.
