Fransa parlamenti evtanaziya və palliativ qayğı haqqında qanun layihələrini səs çoxluğu ilə qəbul edib.
Lim10.az xəbər verir ki, bu barədə "Ouest France" nəşri məlumat yayıb.
Fransa Milli Assambleyasının 305 üzvü həkimlərin köməyi ilə könüllü intiharı dəstəkləyib, 199 deputat isə əleyhinə çıxış edib. Təsdiqləndikdən sonra qanun layihələri Fransa parlamentinin yuxarı palatası olan Senata göndərilib.
Respublikaçılar partiyasından müxalifətçi Filipp Juvən ehtimal edib ki, yeni qanun depressiyadan əziyyət çəkən və qərar verməkdə tam azad olmayan insanları intihara sürükləyə bilər.
Hazırda evtanaziya ilə bağlı qanunvericilik artıq Belçika, Niderland və Kanadada qüvvədədir. 2023-cü ilin aprelindən etibarən Niderlandda evtanaziya qanunvericiliyi 12 yaşa qədər olan uşaqlara da şamil olunur. Bu ölkələrdə insanın tibbi yardım vasitəsilə həyatdan ayrılmasına icazə verilməsi üçün əsas şərt, həkim və müstəqil ekspert tərəfindən xəstənin dözülməz əzablar çəkdiyinin və vəziyyətinin yaxşılaşacağına ümid olmadığının təsdiqlənməsidir.(Publika.az)
