2025-ci il bazarlarda bahalaşma ili kimi yadda qalıb. Xüsusilə də süfrələrin əsas məhsulu olan ət ən çox bahalaşan ərzaqların başında gəlir. Lakin qiymət artımı təkcə ətlə məhdudlaşmır: gündəlik tələbat məhsullarından sayılan soğan və kartofun da qiymətində artım müşahidə olunur. Mütəxəssislər bahalaşmanın əsas səbəbi kimi istehsal və logistika xərclərinin yüksəlməsini göstərirlər.
Ekspertlərin fikrincə, bayram ərəfəsində qiymətlərin daha da yüksələcəyi gözlənilir. Bahalaşma dalğasının 2026-cı ildə də davam etməsi ehtimal edilir.
Alıcılar mövcud qiymət artımından narazılıqlarını bildirirlər:
"İdmanla məşğul olduğum üçün bol protein və tərəvəz qəbul etməliyəm. Tərəvəzlərin qiyməti nisbətən qalxsa da, protein, yumurta, ət və balığın qiyməti hədsiz dərəcədə artıb".
Digər sakin isə dolanışığın çətinləşdiyini vurğulayır:
"Hər şey çox bahadır. Məhsullara daha çox pul xərcləyirəm. Təkcə ət və yağ deyil, digər təsərrüfat mallarında da ciddi artım var".
Alıcıların müşahidələri rəsmi statistika ilə də üst-üstə düşür. Dövlət Statistika Komitəsinin məlumatına görə, noyabr ayında qida məhsullarının qiyməti oktyabr ayı ilə müqayisədə 0,4% artıb.
Daha ətraflı İTV-nin süjetində:
