Dünya Qızıl Şurasının (WGC) məlumatlarını təhlil edən "BestBrokers" tədqiqat şirkətinin məlumatına görə, ilin əvvəlindən bəri Polşa və Qazaxıstanın mərkəzi bankları ən aktiv qızıl ehtiyatı alıcıları olublar.
Lim10.az Valyuta.az-a istinadən xəbər verir ki, onlar müvafiq olaraq 67,1 ton və 32,4 ton qiymətli metal alıblar.
Çin ilk üçlüyü tamamlayır. Bu ölkənin Mərkəzi Bankı ilin əvvəlindən bəri qızıl ehtiyatlarını 22,7 ton artırıb. Türkiyə, Çexiya, Kamboca, Qana, Qətər, Hindistan və Serbiya da bu il qızıl alan ilk 10 mərkəzi bank arasındadır.
Analitiklər bazar və geosiyasi qeyri-sabitlik dövründə ənənəvi olaraq təhlükəsiz sığınacaq hesab edilən bu aktivin qiymətlərinin artması fonunda qızıla tələbatın artdığını qeyd edirlər.
Eyni zamanda, bəzi ölkələr ilin əvvəlindən bəri qızıl ehtiyatlarını azaldıblar. Qızıl ehtiyatlarının azalmasına görə qlobal miqyasda ilk beş ölkə 16,8 ton satan Özbəkistan, Sinqapur (15,8 ton), İndoneziya (12,9 ton), Rusiya (6,2 ton) və Almaniya (1,3 ton) olub.
Mərkəzi Bankın saxladığı qızıl ehtiyatlarına görə qlobal miqyasda ilk beş ölkə hazırda ABŞ (8133 ton), Almaniya (3350 ton), İtaliya (2451 ton), Fransa (2437 ton) və Rusiyadır (2329 ton).
