Putinin əsas seçki rəqibi Nadejdinin namizədliyi qeydə alınmaya bilər?
Rusiyada MSK prezidentliyə namizədlər Boris Nadejdin və Sergey Malinkoviçi onların topladıqları imzalardakı çatışmazlıqlar və qüsurlar barədə məlumatlandırmaq üçün fevralın 5-də söhbətə dəvət edəcək.
Rusiya MSK sədrinin müavini Nikolay Bulayevin sözlərinə görə Nadejdinin imzaları hazırda “qızğın sayım” mərhələsindədir, Malinkoviçin imzalarının sayılması isə demək olar başa çatıb:
"Biz görəndə ki, imzaların arasında artıq bu dünyada olmayan onlarca insan var, onda imza toplayanların etik normalarına dair suallar ortaya çıxır. Namizəd müəyyən mənada bir proseslə əlaqəlidir”.
Bu xəbər Nadejdinin və Malinkoviçin qeydiyyatından mütləq imtina ediləcəyi demək deyildir. Qanuna görə imzaların müəyyən faizində çatışmazlıqlar ola bilər.
Bundan əvvəl namizədliyi “Vətəndaş təşəbbüsü” qrupu tərəfindən irəli sürülmüş Nadejdin və “Rusiya kommunistləri” qrupunun namizədi Malinkoviç qanunun tələb etdiyi kimi MSK-ya Rusiyanın müxtəlif regionlaınrdan olan seçicilərin 105 mindən çox olmayaraq imzalarını təqdim etmişdilər.
Nikolay Bulayev habelə deyib ki, Nadejdin və Malinkoviçin topladıqları imzaların yoxlanması üçün Daxili İşlər Nazirliyinə “on minlərlə” sorğu göndərilib.
Bu da vurğulanır ki, Boris Nadejdin Ukrayna müharibəsinə etiraz edən yeganə namizəddir. O yanvarın 31-də MSK-ya 100 min seçici imzası təqdim etmişdi.
2021-ci ildə Moskva MSK-sı eyni texnologiya ilə paytaxt duması seçkilərinə 20-dən çox müstəqil namizədi buraxmamışdı.
Moskva MSK-sı da siyahılarda “ölü canların” olmasını əsas gətirmişdi.
O vaxt müstəqil namizədlər demişdilər ki, MSK-da imzaları yoxlayanlar “bazada məlumat yoxdur” cavabını almaq üçün bilərəkdən axtarışa yanlış adlar vermişdilər.
Bundan əvvəl MSK öz namizədliklərini vermiş Rada Russkix və Anatoli Bataşevə onların imzalarında aradan qaldırılması mümkün olmayan qüsurların olduğunu barədə məlumat vermişdi.
"Kağıza qənaət"
Hər iki namizəd tələb edildiyindən az sayda imza toplamış və bəzi sənədləri təqdim etməmişdilər.
Russkix təıləb olunan 300 min imzadsan yalnız 476-sını təqdim etmişdi. Bataşevin isə MSK-ya gətirdiyi 5 qutudan yalnız birində imzalar vardı. O demişdi ki, “xeyli kağıza qənaət edib”. Bataşev MSK-dan imzaların elektron qaydada toplanmasına icazə istəmişdi.
Hazırda indiki prezident Vladimir Putinlə birlikdə dörd namizəd rəsmi qeydiyyatdan keçib.
Rusiya prezidenti seçkiləri martın 15-dən 17-dək keçiriləcək.
Müstəqil müşahidəçilər və ekspertlər Rusiyada seçkilərin azad və ədalətli olmadığını bildirirlər.
Hakimiyyət seçkiyə müdaxsilə edir, iqtidar namizədləri üçün daha əlverişli mühit yaradır və birbaşa saxtakarlıqla məşğul olur.
