Ötən gün Mərkəzi Bankın sədri Taleh Kazımovla olan görüşdə mənim diqqət yetirdiyim məsələlərdən biri də virtual aktivlərlə (kriptovalyuta, tokenlər, NFT və s.), kriptovalyuta bazarının tənzimlənməsilə bağlı olub. Mərkəzi Bank sədri Virtual aktivlərlə bağlı qanunun hazırlanmaqda olduğunu və qısa müddətdə başa çatdırılacağını bildirdi.
Lim10.az xəbər verir ki, bunu Azərbaycan İnternet Forumunun prezidenti Osman Gündüz qeyd edib. O bildirib ki, bu qanun ölkəmizdə kriptovalyuta mühitini xeyli dəyişəcək:
"Məhz bu qanun kripto birjaların və bu tip platformaların qeydiyyatı və xarici kripto-platformaların Azərbaycanda fəaliyyəti üçün mühitin yaradılması, kriptoların rəsmi pul vahidi və ya ödəniş vasitəsi kimi tanınması, kriptovalyutalardan əldə olunan gəlirlərin vergiyə cəlb edilməsi və s. bu tip məsələləri tənzimləyəcək.
Xatırladım ki, MDB məkanında Rusiyada, Qazaxıstanda, Özbəkistanda və Belarusda bu sektorun tənzimlənməsilə bağlı qanunlar və hüquqi normalar mövcuddur.
Yeri gəlmişkən, Taleh müəllimin dediyindən belə anladım ki, Mərkəzi Bank rəqəmsal manata daha fərqli və daha konservativ yanaşır. Yəni rəqəmsal manatın dövriyyəyə buraxılmasına virtual aktivlər çərçivəsində deyil, daha məhdud çərçivədə baxılır.
Hazırda Mərkəzi Bank digər ölkələrdə rəqəmsal milli valyutalarla bağlı mövcud təcrübənin araşdırılması və öyrənilməsilə də məşğuldur.
Gələn il rəqəmsal manatla bağlı işlərin daha da sürətlənəcəyi gözlənilir".
Billurə
