Çinin ordusu şənbə günü bəyan edib ki, qüvvələri həssas Tayvan boğazından keçən Kanada və Avstraliya hərbi gəmilərini izləyib və xəbərdarlıq edib.
Lim10.az xəbər verir ki, bu barədə Reuters məlumat yayıb.
Məlumata görə, Çin bu addımı təxribat kimi qiymətləndirib.
Çin Xalq Azadlıq Ordusunun Şərq Hərbi Dairə Komandanlığı bildirib ki, bu hərbi gəmilər “qarışıqlıq yaratmaq və təxribatla” məşğul olublar.
“Kanadalıların və avstraliyalıların bu hərəkətləri yanlış siqnallar göndərir və təhlükəsizlik risklərini artırır,” – deyə bəyanatda vurğulanıb.
Kanada Silahlı Qüvvələrinin sözçüsü isə bildirib ki, hazırda dənizdə yerləşdirilmiş gəmilərin səfər planları barədə şərh verilmir. Onun sözlərinə görə, Ville de Quebec Hind-Sakit okean bölgəsində sülh və sabitliyi təşviq etməyi hədəfləyən Operation Horizon əməliyyatının bir hissəsi kimi yerləşdirilib. Kanada hökumətinin açıqlamasına görə, gəmi bu həftənin əvvəlində Filippin iqtisadi zonasındakı azad naviqasiya təlimlərində iştirak edib.
Avstraliya Silahlı Qüvvələrindən şərh almaq mümkün olmayıb.
Tayvan Müdafiə Nazirliyi isə açıqlamasında bildirib ki, boğazdakı fəaliyyəti yaxından izləyir: “Su yolunun təhlükəsizliyi və sabitliyini təmin etmək üçün müvafiq hava və dəniz qüvvələri yerləşdirir”.
Qeyd edək ki, bu su yolu Çini Tayvandan ayırır.
