Bakının iki qəsəbəsində epidemiyanın səbəbi açıqlanıb
Suraxanı rayonunun Əmircan və Bülbülə qəsəbələrində Hepatit A virusuna (sarılıq) yoluxma hallarının orta məktəb və məktəbəqədər təhsil müəssisəsində baş verdiyi müəyyən edilib.
Bu barədə Səhiyyə Nazirliyi yanvarın 23-də məlumat yayıb.
Bildirilib ki, monitorinqlər "Azərsu" ASC-nin əhaliyə verdiyi içməli suyun mikrobioloji göstəricilərinin standart və normalara cavab verdiyini müəyyən edib.
Hazırda epidemiolojin vəziyyətin nəzarət altında olduğu, yoluxmaların azaldığı vurğulanır. Səhiyyə Nazirliyi su xətləri və çənlərinin yuyulub-təmizləndiyini də bildirir, əhalini gigiyena qaydalarına riayət etməyə çağırır.
Ötən ilin sonundan Əmircan və Bülbülə qəsəbələrində Hepatit A virusunun yayıldığı bildirilir. Həkimlər Hepatit A virusunun əsas mənbələri olaraq çirkli su, çirkli qidalar və yoluxmuş insanlarla təması göstərirlər.
