Ötən ay hava limanlarımız 500 mindən çox sərnişinə xidmət göstərib
Bu ilin sentyabr ayında Azərbaycanın beynəlxalq hava limanları 530 mindən çox sərnişinə xidmət göstərib ki, bu da ötən ilin müvafiq dövrünün göstəricilərindən təxminən 78% çoxdur.
Heydər Əliyev adına Beynəlxalq Aeroportunun Mətbuat xidmətinin yaydığı məumata görə, paytaxt Bakının hava limanının payına 461 min sərnişin düşür ki, bunun da 412 min nəfərini beynəlxalq reyslərin sərnişinləri təşkil edir.
Göstərilən müddət ərzində AZAL və “Buta Airways” aviaşirkətləri 164 min sərnişinə və beynəlxalq reyslər üzrə 56 min sərnişinə xidmət göstəriblər. Bu, beynəlxalq daşımaların ümumi sayının 47%-ni təşkil edib.
2022-ci ilin sentyabr ayında 29 xarici aviaşirkət Bakı hava limanına müntəzəm reyslər yerinə yetirib. AZAL və “Buta Airways” aviaşirkətlərini nəzərə almadan, ən çox sərnişin “Aeroflot”, “Turkish Airlines” və “Utair” aviaşirkətləri tərəfindən daşınıb.
Sentyabr ayında Bakıdan ən populyar beynəlxalq istiqamətlər onluğuna Moskva, İstanbul, Dubay, Tbilisi, Ər-Riyad, Ankara, Əbu-Dabi, Təl-Əviv, İzmir və Antalya şəhərləri daxil olub. Ümumilikdə bu istiqamətlər üzrə 276 min sərnişinə xidmət göstərilib.
