Xırdalanın iflic olmuş nəqliyyat sistemi

Xırdalanda yaşadığım, ərazinin çox ağır həyat şərtlərilə hər gün üzləşdiyim üçün ara-sıra ordan yazıram.
Ən azından ümid edirsən ki, bəlkə hansı rəsminin altındakı kreslonu tərpədə, narahat edə.
Deməli, Xırdalan cəmi 17 kv/km sahəsi olan, ərazicə kiçik bir yaşayış məntəqəsidir. Amma cəmi sahəsi 1700 hektrar olan kiçik ərazidə ən azı 250 min nəfər yaşadığı barədə məlumat var. Əhalinin sayı rəsmi sənəd üzərində 110 min göstərilsə də, icra hakimiyyət sistemində çalışanlardan qeyri-rəsmi kanallarla öyrəndiyimə görə faktiki yaşayanların sayı 250 min nəfəri ötür. Başqa bir rəqəm də tapmışam - elektrik abonentlərinin (yalnız əhali) sayı 50 mindən artıqdır.

Gedənlər-yaşayanlar bilir, bu ərazidə yol infrastrukturu fəlakətli həddədir. Tikdikcə tikiblər, amma normal yol-nəqliyyat infrastrukturu yaratmaq, nəqliyyat növlərini şaxələndirmək heç kimin ağlının ucundan belə keçməyib. Bunlar olub-keçən işlərdir, artıq geriyə dönüş yoxdur. Kimsə dar yollara bitişik 16-18 mərtəbəli binaları söküb normal genişlikdə prospektlər salası deyil, bundən sonra.
Amma indi dözülməz olan odur ki, bütün taksilər dəstə ilə avtobus dayanacaqlarını zəbt edirlər. Avtobusar da öz yerlərində sərnişinlərə xidmət imkanı tapmadığına görə, onsuz da dar olan küçələrdə maşınların hərəkət zolağında insanları düşürüb-mindirməyə məcbur qalırlar. Hərəkət zolağında avtobus dayanırsa, aydındır ki, bütün hərəkət durur və böyük tıxaclar yaranır.
Nə hansısa nəqliyyata nəzarət orqanı, nə yol polisi bu problemi həll etməkdə maraqlı görünmür. Hər gün on minlərlə insan normalda 5-10 dəqiqəyə tərk edə biləcəyi məkanı 35-40 dəqiqəyə güc-bəla ilə çıxıb, Sumqayıt yolundakı növbəti tıxaca çata bilirlər.
Uzunmüddətli müşahidələrim onu göstərir ki, Xırdalan daxilində nəqliyyatın tənzimlənməməsinə, avtobusların dayanacaqda taksi əlindən özlərinə yer tapa bilməməsinə hansısa maraqlar yaşıl işıq yandırır. Əks halda bu problemi həll etmək çox asandır: dayanacaqlara kameralar quraşdirilir, avtobusların yerini zəbt edənlər dərhal cəzalandırılır.
Anlayıram ki, Xırdalanda avtobuslar çox pis işləyir və insanlar 1 manatlıq taksilərdən istifadə etməyə məhkumdurlar. Amma taksi dayanacaqlarının avtobus dayanacaqlarından 5-10 metr irəlidə yerkəşdirilməsi üçün də kifayət qədər imkan var.

Rövşən Ağayev