"Şrek 5" cizgi filminin nümayişi 2026-cı ilin dekabr ayına qədər təxirə salındı

"DreamWorks" studiyası məşhur yaşıl div haqqında cizgi film seriyasının davamı olan "Şrek 5"in təxirə salındığını elan edib. Əvvəlcə film 2026-cı ilin iyul ayında kinoteatrlarda nümayiş olunmalı idi, lakin indi animasiya filmi 2026-cı il dekabrın 23-də ekranlara çıxacaq.

Lim10.az bu barədə "championat"a istinadən xəbər verir.

"Dreamworks" təxirə salınmanın səbəbini açıqlamayıb. Bu, studiyanın prioritetləri ilə bağlı ola bilər. "Şrek"in əvvəlki premyera tarixinə 2026-cı il iyulun 1-də nümayiş olunacaq "Minyonlar 3" təyin edilib.

Gələcək "Şrek"də əsas rolları Mayk Mayers ("Şrek"), Eddi Mörfi ("Eşşək") və Kemeron Dias ("Fiona") səsləndirəcəklər. Filmin süjet xətti gizli saxlanılır, lakin o, yəqin ki, "Əbədi Şrek" və seriyaların məşhur qəhrəmanı haqqında "spin-off" olan "Çəkməli Pişik 2"nin hekayəsini davam etdirəcək.