Venesuela Peru ilə diplomatik əlaqələrini kəsir. Buna səbəb Perunun xarici işlər naziri Xavyer Qonsales Olaeçeanın müxalifət nümayəndəsi Edmundo Qonsalesi Venesuela Bolivar Respublikasının seçilmiş prezidenti adlandırmasıdır.
Lim10.az-ın verdiyi məlumata görə, bu barədə Venesuelanın xarici işlər naziri İvan Xil Pinto "X" sosial şəbəkə hesabında məlumat verib.
"Venesuela hökuməti Peru Respublikası ilə 1961-ci il Diplomatik Münasibətlər haqqında Vyana Konvensiyasının 45-ci maddəsinə əsasən, diplomatik əlaqələri kəsmək qərarına gəlib", - deyə diplomat qeyd edib.
Qeyd edək ki, İvan Xil bir gün əvvəl Venesuelada keçirilən seçkidə hazırkı Prezident Nikolas Maduronun qələbəsini tənqid edən yeddi ölkədən - Argentina, Kosta-Rika, Çili, Panama, Uruqvay, Peru və Dominikan Respublikasından diplomatların geri çağırılacağını bildirib.
Venesuelanın müdafiə naziri Vladimir Padrino Lopes isə prezident seçkisinin nəticələrinin elanından sonra ölkədə dövlət çevrilişinə cəhd edildiyi barədə məlumat verib.
