Aİ şirkətləri işğaldan azad edilmiş ərazilərin bərpasında iştirakda maraqlıdırlar
İqtisadiyyat nazirinin birinci müavini Elnur Əliyev ölkəmizdə səfərdə olan Avropa İttifaqı Şurasının Şərqi Avropa və Mərkəzi Asiya üzrə İşçi Qrupunun nümayəndə heyəti ilə görüşüb.
Nazirlikdən verilən məlumata görə, nazirin birinci müavini ölkəmizin Avropa İttifaqı ilə əlaqələrə xüsusi önəm verdiyini vurğulayıb, tərəflər arasında münasibətlərin artan dinamikasında ticarət və investisiya sahəsində əməkdaşlığın əhəmiyyətini qeyd edib. Bildirilib ki, Azərbaycan-Avropa İttifaqı əməkdaşlığının, xüsusilə Şərq Tərəfdaşlığı Proqramı çərçivəsində əlaqələrin genişləndirilməsi əhəmiyyətlidir. Avropa İttifaqı ilə müxtəlif proqramlar və layihələr çərçivəsində tərəfdaşlıq müasir yanaşmaların tətbiqi, “yaşıl” və rəqəmsal inkişafa keçidin sürətləndirilməsi baxımından önəm kəsb edir. Görüşdə Azərbaycan iqtisadiyyatı, aparılan islahatlar, işğaldan azad olunmuş ərazilərin bərpası istiqamətində görülmüş işlərlə bağlı məlumat verilib.
Avropa İttifaqı Şurasının Şərqi Avropa və Mərkəzi Asiya üzrə İşçi Qrupunun nümayəndə heyətinin rəhbəri Kiara O Brayen Aİ-Azərbaycan əlaqələrindən danışıb, ölkəmizin əlverişli biznes və investisiya mühitindən məmnunluğunu ifadə edib. O Brayen Azərbaycanın əlverişli coğrafi mövqeyinin, nəqliyyat-tranzit potensialının Aİ şirkətlərini cəlb etdiyini və onların ölkəmizdə fəaliyyətdə, eləcə də işğaldan azad olunmuş ərazilərimizin bərpası və quruculuq işlərində iştirakda maraqlı olduqlarını bildirib.
Görüşdə Azərbaycan Respublikası ilə Avropa İttifaqı arasında yeni Saziş layihəsinin Ticarət hissəsi və Avropa İnvestisiya Planının icrası ilə bağlı təqdim ediləcək layihə təkliflərinin cari vəziyyəti, Dayanıqlı İnkişaf Məqsədlərinin Azərbaycanda icrası, bərpaolunan enerji mənbələrinə, texnologiyaya və “yaşıl” keçid sahələrinə investisiyalar, işğaldan azad olunmuş ərazilərdə aparılan yenidənqurma işlərinə Avropa şirkətlərinin cəlb edilməsi, qeyri-neft sektorunun diversifikasiyası ilə bağlı aparılan islahatlar və digər məsələlər barədə İşçi Qrupunun nümayəndələri tərəfindən ünvanlanmış suallar cavablandırılıb.
Tədbirdə İxracın və İnvestisiyaların Təşviqi Agentliyi (AZPROMO) və Kiçik və Orta Biznesin İnkişafı Agentliyi (KOBİA) tərəfindən “Azərbaycanda investisiya imkanları” və KOBİA-nın fəaliyyəti ilə bağlı təqdimatlar edilib.
