Qaz hasilatımız artacaq - cəmi 7%...
“S&P Global Ratings” beynəlxalq reytinq agentliyi neftdən fərqli olaraq, Azərbaycanın qaz hasilatının 2026-cı ilə qədər cəmi 7% artacağını proqnozlaşdırıb.
Bu proqnoz “S&P Global Ratings” beynəlxalq reytinq agentliyinin Azərbaycan üzrə hesabatında yer alıb.
Reytinq agentliyi qeyd edib ki, Şahdənizin ikinci mərhələsindən qaz hasilatının böyük hissəsi artıq hasil edilib və qaz hasilatı 2026-cı ilə qədər cəmi 7% artacaq.
Bildirilib ki, əsas Cənubi Qafqaz Boru Kəməri tam gücü ilə işləyir, buna görə də gələcəkdə, o cümlədən Avropaya əlavə təbii qaz ixracı boru kəməri infrastrukturunun daha da genişləndirilməsinə ehtiyac yaranacaq.
S&P bununla belə, ölkənin təbii qaz gəlirlərin iqtisadiyyatda neftlə müqayisədə cüzi rol oynayacağını açıqlayıb:
“Yeni Şahdəniz II qaz yatağında hasilat 2018-ci ildə başlanmış və iki əlaqəli boru kəməri – müvafiq olaraq Türkiyə və Avropaya qaz daşıyan Trans-Anadolu Təbii Qaz Boru Kəməri və Trans Adriatik Boru Kəməri 2019 və 2020-ci illərdə istismara verilib. 2017-2022-ci illər arasında Azərbaycanın qaz hasilatı 90% artaraq 34 milyard kubmetrə çatıb. Buna baxmayaraq, hətta, bu yaxınlarda hasilatın artımını nəzərə alsaq, biz gözləyirik ki, qaz ixracı Azərbaycan iqtisadiyyatında neftlə müqayisədə cüzi rol oynayacaq və neft hasilatının azalmasını tamamilə kompensasiya edə bilməyəcək. Biz həmçinin qeyd edirik ki, Avropa qaz qiymətləri 2022-ci ilin ikinci yarısında nümayiş etdirilən yüksək qiymətlərdən əhəmiyyətli dərəcədə aşağı düşüb. Son vaxtlar təbii qazın qiyməti Rusiya-Ukrayna müharibəsi başlamazdan əvvəl yaşanan səviyyələrdən də bir qədər ucuzdur”.
