“AzerGold” qızıl satışından 73 milyon manat gəlir əldə edib
Bu ilin yanvar-iyun aylarında Daşkəsən və Göygöl rayonlarında yerləşən mədənlərdə aparılan hasilat işləri nəticəsində ümumilikdə 18 min unsiya qızıl, 53 min unsiya gümüşün istehsalı həyata keçirilib.
“AzerGold” QSC-dən verilən məlumata görə, qızıl hasilatı plandan 3 faiz, gümüş hasilatı isə 53 faiz artıq yerinə yetirilib. Hesabat dövründə 18 min unsiya qızıl, 42 min unsiya gümüşün dünya birjasında satışı təmin edilib.
Qızıl və gümüş ixracı isə müvafiq ardıcıllığa uyğun olaraq plandan 31 faiz və 74 faiz artıq icra edilib. Birinci yarımil ərzində qiymətli metalların daxili və xarici bazarlarda satış əməliyyatları nəticəsində 73 milyon manat gəlir əldə edilib. Bu vəsaitin 61 milyon manatını ixrac gəlirləri təşkil edib.
Hesabat dövründə dövlət büdcəsinə vergi formasında 15 milyon manata yaxın vəsait ödənilib. Bununla yanaşı, Dövlət Sosial Müdafiə Fonduna təqribən 2 milyon manat köçürülüb.
Qeyd edək ki, “AzerGold”un fəaliyyətə başlamasının 7-ci ildönümü ərəfəsində ümumi satış gəlirləri 1 milyard 28 milyon manatı üstələyib.
Satış gəlirlərlərinin 990 milyon manatını ixracdan əldə edilən gəlirlər təşkil edir. Belə ki, şirkətin fəaliyyəti nəticəsində 358 min unsiya qızıl, 712 min unsiya gümüşün ixracı həyata keçirilib. İxracla yanaşı, ötən dövr ərzində yerli zərgərlik bazarının inkişafı məqsədilə 11 min unsiyadan çox qızıl, 76 min unsiyadan çox gümüş daxili bazara yönəldilib. Bununla yanaşı, bu müddət ərzində dövlətə vergi formasında 119 milyon manata yaxın vəsait ödənilib. DSMF-yə ödənişlər isə 17 milyon manat təşkil edib.
